сукут

от 1. Кимсадан ёки ҳеч кимдан чурқ этган товуш, садо чиқмай, жимлик ҳукм сурган ҳолат; сўзсизлик.

Сукут қилмоқ. Сукут сақламоқ. Сукутга кетмоқ (ботмоқ, чўммоқ). Сукут — аломати ризо. — Мақол

Аҳмоққа жавоб — сукут. — Мақол

Қизча болаларга хос қайсарлик билан бошини эгганича жим турар, унинг сукутида, бутун хатти-ҳаракатида нимагадир қарши сўзсиз исён бор эди. — Ёшлик

Сукут сақламоқ ҳам-ма вақт ҳам ақллиликдан дарак беравермайди, аммо билганингни шақиллаб гапира бериш —ўз обрўйингни пақирлаб тўкиш демак — Мирмуҳсин, Умид

2. айн. Сукунат 1.

Тўрғайлар ухлашур ёвшан тагида, Дарё бўйларида — тўқайда сукут. — Миртемир, Асарлар

Дунёда шундай қўшиқ борки, янграганда, олам бир дақиқа сукутга чўмади. — Саодат