Стилистика

Бадиий нутқнинг турли услублари ҳақидаги таълимот. Стилистика тил ҳақидаги фанга асосланади, лекин шу билан бирга, у мустақил вазифага эга бўлган фан соҳасидир. Стилистика умуман инсон нутқини ўрганади. Бироқ стилистиканинг махсус соҳаси ҳам мавжуд бўлиб, бадиий нутқни, поэтик тил хусусиятларини, бадиий асар тили ва унинг ифода воситаларини ўрганиш бевосита шу соҳанинг вазифасига киради. Бу соҳани баъзан адабиётшунослик стилистикаси деб ҳам аташади. Стилистика хулосаларисиз бадиий нутққа хос у ёки бу ҳодисанинг аҳамияти ва ролини тўғри англаб бўлмайди. Адабий-бадиий санъат услубини мукаммал эгаллаган ёзувчи, ифода услуби кўпчиликка манзур бўлган адиб стилист деб юритилади. stilistika