solinmoq

fl. 1. Solmoq 1-2, 4-5, 7-9, 12-19, 21 feʼlining majhul nisbati.

Jajjigina xona billur qandildan yogʻilayotgan nurga toʻlgan, devorlardagi keksa artistlarning suratlari solingan ramkalar oynasi yaraqlab turardi. — Oʻ. Hoshimov, Qalbingga quloq sol

Uzuklarga solingan Koʻzday boʻldi Oychinor. — Oysuluv

Suv yoʻq, suv solingan koʻzacha otning tagida qolib singan. — A. Qahhor, Asarlar

Shimining tizzasi bilan oʻng choʻntagining tagiga yamoq solingan edi. — S. Karomatov, Oltin qum

Supaning qarshisiga, oʻn qadamcha nariga moʻjazgina bir chorpoya qoʻyilib, unga samovarning eski-tuski paloslari solindi. — M. Ismoiliy, Fargʻona tong otguncha

Toʻgʻri, idishlarni oʻz vaqtida qaytarmagan savdo tashkilotlariga jarima solinyapti. — Gazetadan

Zaynabning ogʻasi tomonidan ushlanib, kishanga solingan mojarosi eshitildi. — A. Qodiriy, Oʻtgan kunlar

Hovlining uch tomoni bir uy, bir ayvon qilib qatorasiga solingan yangi binolar bilan oʻralgan, bir tomoni giloszor bogʻcha. — Oybek, Tanlangan asarlar

Nabigulning akasi Qodirga popop mashina bilan gul solingan qora baxmal bir roʻyja koʻrsatdi. — A. Qahhor, Asarlar

Lekin sxematik, tili gʻaliz, baʼzi qoida va shablonga solingan asarlar kishilarga yoqmayapti. — OʻTA

Agar soyabon aravada ketayotgan ikki xotinning visir-visiriga quloq solinsa, balki Teshaboyning sirini bilib olish mumkin boʻlar? — M. Ismoiliy, Fargʻona tong otguncha

2. Solmoq 17 feʼlining oʻzlik nisbati.

Gʻulomjon shuncha gullar ichidan izlagan gulini topmadimi, Qoʻllari osilib, boshi solinib chiqdi gulzordan. — M. Ismoiliy, Fargʻona tong otguncha

3. Osilmoq, osilib tushib turmoq.

Maʼmurjonning oʻsiq qoshlari solindi, goʻyo shu qoshlar ogʻirligidan koʻzlar yerga qarardi. — Sh. Xolmirzayev, Toʻlqinlar

v be put, placed

salınıw