sinf
синфsinf I
ot Kishilarning tarixan shakllangan ishlab chiqarish tizimida, ijtimoiy mehnatni tashkil etishda muayyan mavqe va oʻringa ega boʻlgan, ishlab chiqarish vositalariga, ijtimoiy boylikning taqsimla-nishiga bir xil daxldorligi va manfaatlarining umumiyligi jihatidan birlashgan katta guruhi; nisbatan barqaror boʻlgan katta ijtimoiy qatlam.
Ijtimoiy sinflar. Mulkdorlar sinfi.
Oʻzbekistonda fuqarolarga mulkdor boʻlish huquqining berilishi jamiyatni qarama-qarshi sinflarga boʻlib oʻrganish gʻoyasini ham inkor etadi. — OʻzME
Hozir sotsiologiyada jamiyatni sinflarga va boshqa ijtimoiy guruhlarga boʻlishning turli mezonlari ilgari surilmoqda. — OʻzME
sinf II
ot 1. Oʻquvchilar tomonidan bir oʻquv yili davomida erishiladigan umumiy bilim saviyasi; maktab taʼlimining har bir bosqichi; maktabning asosiy tarkibiy birligi.
Sinfdan sinfga oʻtmoq.
Taʼlat oʻninchi sinfni kumush medal bilan tamomladi. — Oʻ. Hoshimov, Qalbingga quloq sol
10- A sinfida oʻqiydigan Rustam., kuzda paxta bayramiga atab maktabda oʻtkazilgan kechada rubob chalib, ashula aytganida ham uni yaxshi koʻrarkan. — Oʻ. Hoshimov, Qalbingga quloq sol
2. Oʻquv yurtlarida mashgʻulot oʻtkaziladigan xona, auditoriya.
Yorugʻ sinf. Sinf doskasi.
Sinfga kirishim bilan, bolalar qichqirib yuborishdi: — Ur-re-ye, Hoji keldi. — E. Raimov, Ajab qishloq
Oʻquvchi biz koʻpchilikmiz, oʻqituvchi hammamizni baravar koʻrolmaydi, deb oʻylaydi. Holbuki, oʻqituvchi sinfdagi har bir bolaning nima qilayotganini aniq bilib turadi. — Oʻ. Hoshimov, Qalbingga quloq sol
3. koʻchma Boshlangʻich va oʻrta maktablarda oʻquv yili davomida yagona oʻquv dasturi asosida taʼlim oluvchi oʻquvchilar jamoasi.
Sinf rahbari.
Sinf bir ogʻizdan Assalomu alaykum! deb qichqirdi. — M. Ismoiliy, Fargʻona tong otguncha
Maktabda yomon boʻlsam, yo ikki kun bormasam, butun sinf oyoqqa turardi. — Yoshlik
4. Badiiy oʻquv yurtlarida oʻquvchilarning biror oʻquv fani boʻyicha ixtisoslashtirilgan guruhi.
Kompozitsiya sinfi.
Malikani Oʻzbekiston xalq artisti S. Qobulova sinfiga oʻqishga qabul qilish maqsadida tayyorlov kursida oʻqitishdi. — Gazetadan
5. biol. Oʻzaro qarindosh hayvonlar yoki oʻsimliklar turkumlarini birlashtiruvchi kategoriya.
Sutemizuvchilar sinfi.