salla
саллаsalla I
ot Uzunligi 1,5 metrdan 7 metrgacha boʻladigan, doʻppi, kuloh, telpak ustidan oʻraladigan sidirgʻa mato, doka; musulmon erkaklarning bosh kiyimi.
Salla oʻramoq. Kalla boshqa, salla boshqa. — Maqol
Egnidagi yoʻl-yoʻl beqasam toʻn, boshidagi oppoq misqoli salla uning yigitlik koʻrkini yana ham ochar edi — K. Yashin, Hamza
Qorovul chol ham boshidan sallasini olmoqchi edi, chuvalib, oyogʻi ostiga tushdi. — N. Aminov, Qahqaha
- Baqa salla yoki qurbaqa sallasi Isteʼmol qilib boʻlmaydigan zaharli zamburugʻ oʻsimligining bir turi. Qarshidagi boʻgʻoti tushib, oʻrtasi yemirilgan, devoridan baqa salla oʻsib chiqqan xaroba binolar — A. Qodiriy, Oʻtgan kunlar
- Ichagingni (yoki ichak-chavogʻingni) boshingga salla qilib qoʻyaman Doʻq-poʻpisa iborasi. Esing borida etagingni yop, boʻlmasa, ichak-chavogʻingni boshingga salla qilib qoʻyaman. — Yoshlik
- Paytava salla [Xolisxon:] Paytava sallalardan oʻlib boʻldim. Uxlab yotibdi, deng. Hamza, — Paranji sirlari
salla II
ot shv. Maʼraka-marosimlarda tuxumga qorilgan xamirdan salla shaklida oʻrab, yogʻda pishiriladigan milliy pishiriq; oʻrama.