qolip

ot 1. Tikiladigan poyabzalning ichiga qoʻyiladigan va uning katta-kichikligini, shaklini belgilaydigan moslama.

Yogʻoch qolip. Qirqinchi qolip. Etikni qolipga tortmoq.

Uning katta boshi-da xuddi qolipga tortilgan mahsiday tarang turgan chust doʻppisi ham bor edi. — P. Tursun, Oʻqituvchi

2. Amaliy sanʼatda: bezak naqshni qoʻyib (tortib), bosib yasash uchun ishlatiladigan maxsus shakldagi moslama; andaza.

3. maxs. Quyma detal yoki mahsulotga shakl beradigan moslama.

Gʻisht qolipi. Sovun qolipi. Qozon qolipi. Qolipga detal quymoq.

Ayvonda sovungarning qolipiday qotib qolgan oʻrtoq Mehmonov bu soʻzlarni eshitar ekan, qoʻlini paxsa qilib, xotiniga oʻkira ketdi. — S. Abdulla, Obroʻyim toʻkiladi

4. koʻchma Andaza, shablon.

Bir qolipdagi gap. Bir qolipda qurilgan imoratlar.

Ochigʻini aytsam, ularni bir qolipda ishlashdan chekinishga majbur qilishgacha borib yetdik. — Gazetadan

5. koʻchma Had, chegara, meʼyor.

Sinfda bordir bir xil Erkatoy, haddan oshgan, Shoʻxligi suyuqlashib, Qolipdan oshib-toshgan. — H. Nazir

Odam taqdirini hal qilish uchun sizning qolipdan chiqqan savolingiz torlik qiladi. — A. Muxtor, Tugʻilish