qism

ot 1. Butunning tarkibi, uzviy boʻlagi yoki hissasi, ulushi.

Daromadning uchdan bir qismi. Mehmonlarning bir qismi.

Xullas, Tuyamoʻyinga kelib, izlab yurgan narsalarimning bir qismini topganday edim. — S. Siyoyev, Yorugʻlik

Yoʻlning qolgan qismiga eshak ish berdi. — J. Abdullaxonov, Oriyat

Anvar oʻzini supaning qorongʻi qismiga oldi. — A. Qodiriy, Mehrobdan chayon

2. Bir ish, majlis, asar va shu kabilarning maʼlum darajada mustaqillikka ega boʻlgan alohida boʻlagi; boʻlim.

Uch qismdan iborat roman,

Institutdagi kechada hisobot dokladi tugadi. Soʻngra badiiy qism boshlandi. — Gʻayratiy, Uzoqdagi yor

Mohidil yetib kelganda, tantanali qism boshlanib qolgandi — J. Abdullaxonov, Toʻfon

Mehmonlar bilan vakillarning qizgʻin tabriklari, xayrli tilaklaridan keyin kechaning rasmiy qismi tugadi. — P. Tursun, Oʻqituvchi

3. Mashina, mexanizm, inshoot va shu kabilarni tashkil qilgan boʻlaklardan har biri; detal.

Traktorning ehtiyot qismlari.

Emin uni [pulemyotni] shoshilib qoʻliga oldi-da, bir zumda qismlarini ajratib, gazetaga terib qoʻydi. — I. Rahim, Chin muhabbat

4. harb. Qurolli kuchlar tarkibidagi alohida boʻlim, boʻlinma yoki birikma.

Minomyotchilar qismi. Polkning sanitariya qismi. Qism komandiri.

Shu choq artilleriya qismlari ogʻir toʻplari bilan oʻta boshladi. — Oybek, Quyosh qoraymas

Jarohatlarim bitib ketishi bilan yana qismimga qaytib bordim. — Nazarmat, Joʻrlar baland sayraydi