qatiq
қатиқqatiq
ot Sutdan tomizgʻi solib ivitib tayyorlangan parhez mahsulot.
Yangi ivitilgan qatiq. Qatiq toʻkilsa, yuqi qolar, ayron toʻkilsa, nesi qolar. — Maqol
Sutdan ogʻzi kuygan qatiqni ham puflab ichadi. — Maqol
Ovqat pishdi. Qozonning zangi chiqib qoraygan goʻjaga qatiq ham rang kirgizolmadi. — A. Qahhor, Anor
- Miyaning qatigʻi Sher yana Sherzodning ustiga tashlanishga oʻzini chogʻlab koʻrdi, lekin miyasining qatigʻi chiqib holsizlangani uchun majoli kelmadi. — Ertaklar
- Moshxoʻrdaga qatiq boʻlmoq Oraga tushmoq; aralashmoq, suqilmoq. Moshxoʻrdaga qatiq boʻlib, Ochilni arang suyab qoldim-u, sovxozning bir boʻlimiga agronom qilib qoʻydim — A. Muhiddin, Chap choʻntak
- Oftobda (yoki oftobshuvoqda) qatiq ichishgan (yoki yalashgan) Doim birga boʻlgan; hamtovoq, ulfat. Siz qayerda boʻlsangiz, biz ham oʻsha yerda boʻlamiz. Oftobda sherikchilikka qatiq ichgan odamlar oxirigacha birga boʻlishi kerak. — B. Rahmonov, Xoʻjayin koʻchdiDirektor Salimov bilan oftobshuvoqda qatiq yalashganmiz. Nahotki, igna oʻz teshigini tiksa. — Mushtum