пўлат

от 1. Темирнинг маълум миқдордаги углерод билан қўшилишидан ҳосил бўлган, кулранг, чўкичланувчи қаттиқ металл.

Зангламайдиган пўлат.

Ие-е, менда пўлат нима қилади, тақсир. Эски тақалар, темир-терсаклар билан зўрға қимирлаб турибмиз. — М. Исмоилий, Фарғона тонг отгунча.

2. Шу металлдан тайёрланган, ясалган.

Пўлат сим. Пўлат қайчи. Пўлат тиш. Пўлат пичоқ қинсиз қолмас. — Мақол

3. фолк. Қилич, шамшир.

Олмос пўлат боғлаб мен ҳам белимдан, Дев излаб чиққанман ўсган элимдан. — Маликайи айёр

Пўлат билан қирди девни, кескир ханжарини урди, яланғочлаб қилич солди. — Маликайи айёр

4. кўчма Метиндай мустаҳкам, бузилмас, енгилмас.

Пўлат қалъа.

5. Кучли, забардаст.

Қиш. Деҳқон аҳлининг пўлат мускулларига ҳордиқ берадиган, кўнгил ёзадиган фасл. — Ўзбекистон қўриқлари

Бизнинг пўлат қудратимиз — бирлигимизда. — М. Шайхзода

6. Пўлат (эркаклар ва хотин-қизлар исми).