pokiza

sft. 1. Top-toza, pok.

Pokiza idish. Pokiza kiyim.

Ona tabiatimizni hamisha toza, pokiza saqlash haqida qaygʻurmogʻimiz lozim. — Sh. Rashidov, Yangi yer haqida soʻz

Buloq, suvi qanchalik begʻubor va pokiza. U togʻ boshidan ana shu sifatlari bilan pastga intiladi. — Yoshlik

Odam degan pokiza yurishi kerak. Toza yurgan odamning tabiati ravshan boʻladi. — S. Ahmad, Sud

2. koʻchma Halol, pok, toʻgʻri; sof, musaffo.

Olima [Xadicha Sulaymonova] hayotining oxiriga qadar xalq uchun pokiza vijdon bilan xizmat qildi. — Saodat

Oqkoʻngil, pokiza, halol oʻqituvchining yashash tarzi, fikrlash yoʻsini doimo barcha uchun maktab boʻlib kelgan. — Fan va turmush

Pokiza koʻngli bilan, baʼzan oʻta qattiq qahri, baʼzida juda yumshoq mehri bilan bogʻlab olgan. — S. Zunnunova, Olov

3. Ozodalikka qattiq rioya qiladigan, ozoda.

Pokiza ayol.

Karim aka nihoyatda pokiza, sodda edi. — Yoshlik