ўзак

от 1. Ўсимлик пояси ва илдизининг кўпинча юмшоқ тўқимадан иборат бўладиган ички қисми.

Толнинг ўзаги.

2. шв . Дарахт, бута кабиларнинг танаси; поя.

Ғуломжон ўрикнинг кекса, ёʻғон ўзагини ушлаб туриб тўхтади. — М. Исмоилий, Фарғона тонг отгунча

Сумба қилдим ирғайнинг ўзагидан. Оқ олма, қизил олма.

3. Илдизмеванинг (ёғоч ўзагига ўхшаш) ўрта қисми.

Сабзининг ўзаги.

4. тех . Электромагнит ва шу кабиларнинг ичига, ўртасига ўрнатилган қисм; стержен.

Электромагнит ўзаги.

5. тлш . Сўзнинг асл маъносини билдириб, янги сўз ясалишига асос бўладиган, сўз ясовчи қўшиладиган энг кичик қисм; сўз ясалиш асоси.

6. кўчма Бирор нарсанинг энг муҳим, асосий қисми; асос, моҳият.

Улар [аёллар] оиланинг ўзаги ва файзигина эмас, балки жамоатчилик ҳаётида ҳам алоҳида ўрин эгаллайдилар. — Газетадан

Менинг назаримда, ўртоқ Мардиев, биз қилаётган ишнинг ўзаги битта! Умумхалқ, умумдавлат манфаати. — С. Кароматов, Сўнгги бархан