ўйинчоқ

от 1. Болаларнинг ўйнаши, овуниши учун хизмат қиладиган нарса ёки буюм.

Ўйинчоқ сотиб олмоқ. Ўйинчоқ машина:

Буваси унга дадасига ўхшаб қўғирчоқлар, ўйинчоқлар, ҳар хил ҳайвонларнинг расми солинган китоблар олиб келиб бермасди. — С. Анорбоев, Оқсой

Чиқарманг қурол, оқмасин қонлар. Китоб, ўйинчоқ беринг бизларга! — И. Муслим

2. кўчма Бировнинг кўнгил очиш воситаси; эрмак.

Ташландиқ бу қизингиз, қўлма-қўл юрувчи бу ўйинчоқ қизингиз ким-у, сиздек бир меҳрибон онани қон йиғлатган ким? — А. Қодирий, Ўтган кунлар

Кимларнинг соф ҳаёти Қўлда ўйинчоқ. — Ғайратий

3. кўчма Бировнинг хоҳшини сўзсиз, кўр-кўрона бажарувчи, итоатгўй; қўғирчоқ.

Мўғуллар ва уларнинг қўлида ўйинчоқ бўлган амир Бурҳониддин ташвишга тушиб, бу даҳшатли халқ қўзғолонини бостириш ҳаракатига тушиб қолдилар. — М. Осим, Маҳмуд Торобий