олов
olovолов
от 1. Юқори ҳароратда ёниб, нурланиб турган газ, аланга, ўт.
Олов ёқмоқ. Оловни ўчирмоқ. Қумғонни оловга қўймоқ. Оловнинг тиши ёʻқ, ҳўл-қуруқ билан иши ёʻқ. — Мақол
2. Чўғ.
Танчанинг оловини очинг, тақсир, баданимда қалтироқ турди. — Ҳ. Ғулом, Машъал
[Ёʻлчи] Бир қўлини қизнинг пешонасига қўйди: — Нақ оловдай — деди. — Ойбек, Танланган асарлар
3. Иссиқлик, ҳарорат.
Қуёш олови.
Қуёш осмондан олов қуйяпти. — С. Аҳмад, Таъзим
Ҳувуллаган тундай ёлғизлик қурсин, Ёлғиз чақмоқтошдан чиқмайди олов. — Ч. Эргаш, Орзунинг оғир киприклари
Ёʻлчи қуёшнинг олов селида чўмилиб, тўнка ковлар эди. — Ойбек, Танланган асарлар
4. кўчма Ғайрати ичига сиғмайдиган, юрагида ўти бор, жўшқин.
Олов йигит.
Синфнинг энг шўх, олов ўқувчиси Санжар бўлса, оғзини катта очганча, Ойша холага тикилиб қолди. — С. Зуннунова, Кўк чироқлар
Ўзиям десангиз, отинойиси, олов. На бир қўрқишни билади, на бир нарсадан ман тортишни. — Ш. Тошматов, Эрк қуши
5. Жўшқин туйғу, ҳиссиёт.
Шунча тутқун бўлишига қарамасдан, бу қизнинг қалбига муҳаббат олови аллақачон тушган эди. — С. Зуннунова, Олов
Исфандиёрнинг инжиқ ва худбин кўнглида ўч олови ёнарди. — С. Сиёев, Аваз
- Икки олов орасида (ёки ўртасида) Қолмоқ Жуда мушкул аҳволда, нима қиларини билмай қолмоқ. Шўрлик асирлар икки олов орасида қолган эдилар: чиқмай десалар, мўғуллар орқаларидан санчар, чиқай десалар, мудофаачиларнинг ўқ ва найзасига санчилар эдилар. — М. Осим, Ўтрор
- Кесакдан олов чиққандай Ғайрати ёʻқ, лоқайд одам кутилмаган бир иш қилганда айтиладиган ибора.
- Олов кўзлар Чарақлаб, ёниб турган кўзлар. Ёш Ҳожия олов кўзларини чарақлатиб, Онахонга тикилган эди. — А. Мухтор, Опа-сингиллар
- Олов нафасли Сўзи ўткир. У айтган толлар қулапти, бош тиқмоқчи бўлган мактаб-маориф соҳасига тамоман янги одамлар, олов нафасли ёшлар келипти. — А. Қаҳҳор, Қўшчинор чироқлари
- Уруш оловини ёқмоқ Уруш чиқариш учун халқларни бир-бирига гижгижламоқ, уруш чиқармоқ, урушни бошлаб бермоқ.