ўжар

сфт. 1. Тўғри, мақбул маслаҳат, гап-сўзга ҳам қулоқ солмай, ён бермай, ўз фикрини маъқуллайверадиган; гап уқмайдиган, қайсар.

У қанча сўзламасин, бу китобнинг динга зиёнсиз эканини ўжар мусулмонга тушунтира олмайди. — Ойбек, Танланган асарлар

Баъзи бир ўжар, фойдали ишдан бўйин товловчи кишилар унинг маслаҳати, ёрдами туфайли ҳаётда ўз ёʻлини топиб олди. — Газетадан

— Эртага вожатийдан сўраймиз, — деди Қудрат гап уқмас, ўжар синглисини тинчитиб. — Ҳ. Назир, Сўнмас чақмоқлар

2. Ялиниб-ёлвориш, илтимос кабиларга кўнавермайдиган, ўз сўзидан, фикридан қайтмайдиган; бир сўзли.

Унга камоли эҳтиром билан салом берди. Дилидаги гапларни астойдил тушунтириб тўкди. Ўн бешинчи тушмагур бир сўзли ўжар одам экан. Кўнмади. — С. Аҳмад, Сайланма

3. кўчма Бошқанинг измига юрмайдиган; бўйсунмас.

Ўжар дарё. Ўжар табиат.

Ғуломжоннинг миясига яна қон югурди, бояги таниш ўжар ҳис яна бутун вужудини қамради. — М. Исмоилий, Фарғона тонг отгунча

Сув ўжар, уни тизгинлаш осон эмаслигини Пўлатжон билади. — С. Аҳмад, Қадрдон далалар

4. кўчма Қайтариб, ўзгартириб бўлмайдиган нарса ҳақида.

Ҳақиқат — ўжар нарса. Кишиларнинг кимлиги, қайси вазифада ишлашини юз-хотир қилмайди. — А. Набихўжаев, Ўжарнинг қисмати

Фирибгар ҳар қанча айёрлик қилмасин, ўжар фактлар олдида қилмишига иқрор бўлди. — Газетадан