нохуш

сфт. 1. Таъби хира, кайфияти ёмон, бузуқ.

Эрталаб Маҳкам уни нохуш аҳволда кўриб, яна муросалари келишмаганини сезди. — П. Қодиров, Уч илдиз

Гулсум нохуш кўринарди. Унинг кўнгли нимагадир ғаш экани юзидан билиниб турарди. — П. Турсун, Ўқитувчи

2. Хуш келмайдиган, ёқимсиз, кўнгилсиз.

Нохуш хабар. Нохуш гап.

Унинг [Мунисхоннинг] юзи заъфарон бўлди. Айниқса, бугун эрталаб почталон ташлаб кетган газета нохуш хабар келтирди. — С. Аҳмад, Ойдин кечалар

3. Носоғ, бетоб, касал.

[Башорат хола] Кечга яқин ўзини нохуш сезиб, вақтли ётиб қолди. — А. Мираҳмедов, Кулган чечаклар