noxush

sft. 1. Taʼbi xira, kayfiyati yomon, buzuq.

Ertalab Mahkam uni noxush ahvolda koʻrib, yana murosalari kelishmaganini sezdi. — P. Qodirov, Uch ildiz

Gulsum noxush koʻrinardi. Uning koʻngli nimagadir gʻash ekani yuzidan bilinib turardi. — P. Tursun, Oʻqituvchi

2. Xush kelmaydigan, yoqimsiz, koʻngilsiz.

Noxush xabar. Noxush gap.

Uning [Munisxonning] yuzi zaʼfaron boʻldi. Ayniqsa, bugun ertalab pochtalon tashlab ketgan gazeta noxush xabar keltirdi. — S. Ahmad, Oydin kechalar

3. Nosogʻ, betob, kasal.

[Bashorat xola] Kechga yaqin oʻzini noxush sezib, vaqtli yotib qoldi. — A. Mirahmedov, Kulgan chechaklar