НЕФТЯНАЯ (ГАЗОВАЯ) СКВАЖИНА

нефт (газ) олиш учун мўлжалланган қудуқ. Нефт (газ) олиш қудуқлари ер остидаги, кўндаланг кесими чуқурлигига нисбатан жуда кичик, силиндр кўринишдаги сунъий тоғ иншооти. Н.(г.).қ. асосий элементларига қуйидагилар киради: туби — бурғилаш даврида чуқурлашиб боради; деворлари — қудуқнинг ёнланма юзаси; оғзи — қудуқнинг ёнланма юзасининг ер юзаси билан кесишган чизиғи; ўзаги (танаси) — қудуқ деворлари билан чегараланган бўшлиқ (қувурлар билан мустаҳкамланган ёки мустаҳкамланмаган бўлиши мумкин); қудуқ ўқи — қудуқ бўшлиғи марказини кўрсатувчи траектория. Н.(г).қ. муҳандислик иншооти бўлиб, қуйидаги асосий кўрсаткичлардан иборат тузилишга эга: ўзагининг (танасининг) диаметри — тоғ жинсларини емирувчи бурғи диаметрига тенг; умумий чуқурлиги; қудуқ ўзагини (танасини) мустаҳкамланган оралиқлари — мустаҳкам бўлмаган тоғ жинсларидан иборат оралиқлар МҚБ билан беркитилади; қудуққа туширилган қувурлар бирикмасининг ташқи ва ички диаметри (ёʻлланма қувурлари, кондуктор, мустаҳкамловчи қувурлар, насос-компрессор қувурлари); қувур орти бўшлиғининг (қудуқ ва мустаҳкамловчи қувурларнинг ташқи диаметри оралиғидаги ҳалқасимон бўшлиқ) кесимда ўтилган қатламларни ажратиш учун сементланган оралиқлари; қудуқ туби тузилиши — маҳсулдор қатлам оралиғида., Нефт (газ) қудуғи