нақ

1. Айтилганнинг, кўзда тутилганнинг ўзгинаси; худди, айни.

— Отангизга раҳмат, Юсвали тоға! — деди бошини қимирлатиб Мели полвон. — Гапнинг нақ онасини айтдингиз-қўйдингиз! — П. Турсун, Ўқитувчи

2. Қоқ, айни, худди.

Нақ ярим кечада. Нақ шу пайтда.

3. Оз бўлмаса; деярли.

Нақ йиқила ёздим.

4. Роса, обдан.

Баҳорда чунонам қўш тортдики, жонивор қорабайирни нақ терга тушириб юборди. — М. Исмоилий, Фарғона тонг отгунча

5. Бўлмаса, акс ҳолда.

[Самоварчи] Товушини баланд қўйиб, ўзича валдирар эди: — Ҳой, аравакаш бола, отингни торт, нақ тезагини дўппингга солиб бераман! — Ойбек,Танланган асарлар