murakkab

sft. 1. Yechilishi, tushunilishi, bajarilishi qiyin; ogʻir, mushkul.

Murakkab masala.

Bu ish juda murakkab. — H. Gʻulom, Mashʼal

Homilaning moʻjizali rivojlanish jarayoni biologlar oldida turgan eng murakkab muammolardan biridir. — Fan va turmush

Atoqli xalq sanʼatkori hayotning eng chigal, murakkab tomonlarini ham jonli til bilan sodda qilib tushuntira olardi. — T. Obidov, Yusufjon qiziq

2. Katta qiyinchiliklari boʻlgan, mashaqqatli, ogʻir.

Xoʻjaligimiz dehqonlari murakkab ob-havo sharoiti yuz bergan yilda bir jon-bir tan boʻlib mehnat qilib davlat topshirigʻini sharaf bilan ado etdilar. — Oʻzbekiston qoʻriqlari

Men bilan tengdosh boʻlgan yoshlarning oʻsmirlik hayoti juda murakkab bir vaqtga toʻgʻri kelgan edi. — N. Safarov, Jasoratning davomi

3. Tarkibi bir necha (juda koʻp) unsurlardan tashkil topgan.

Koʻz juda murakkab optik sistema boʻlib, kishi hayotida koʻzning yaxshi koʻrishi muhimdir. — Gazetadan

Fan va texnikaning uzluksiz rivoji hamda yangi-yangi mukammal moslama va mexanizmlar yaratilishi tufayli yanada murakkabroq EHM-lar paydo boʻla boshladi. — Fan va turmush