МАССИВНЫЙ ПРИРОДНЫЙ РЕЗЕРВУАР

Massiv tabiiy saqlagich (ombor) — oʻtkazuvchan togʻ jinslarining qalin qatlami. Usti va yonlaridan suyuqlik oʻtkazmaydigan jinslar bilan chegaralangan. M.t.s.ni tashkil etgan kollektorlar litologik bir jinsli yoki turli jinsli boʻladi. Bir jinsliligi karbonat, metamorfik yoki otqindi jinslardan iborat. Bunday kollektorlarning oʻtkazuvchanligi va gʻovakliligini jinslardagi gʻovak va yoriqlar tashkil etadi. Massiv saqlagichlardagi gʻovaklilik va oʻtkazuvchanlik zonalari qatʼiy stratigrafik vaqtga mos kelmaydi. Koʻpincha stratigrafik yuzani kesib oʻtadigan alohida ajralgan, yaxshi gʻovakli va oʻtkazuvchan zonalarni kuzatish mumkin. Massiv saqlagichlarda suyuqlik va gazlarning yonlama harakatlanishi oʻtkazuvchan zonalar bilan cheklangan va ularning harakati katta masofaga yetib bormaydi. Baʼzan massiv va qatlamli saqlagichlarning oʻzaro bogʻliqligi kuzatiladi.