маълум

сфт. 1. Ҳамма ёки тегишли кишилар биладиган, ошкор, аён.

Маълум нарса. Маълум жой.

Қораилон фақат икки кишига маълум: уларнинг бири — Мирзо, иккинчиси — Шоҳ Малик тархондир. — Мирмуҳсин, Меъмор

Бу вазифани бажариш бениҳоя оғир бўлажаги разведкачиларнинг ахборотларидан маълум эди. — Т. Рустамов, Мангу жасорат

2. мат. Олдиндан берилган, мавжуд.

Маълум сонларни номаълумлардан ажратиш.

3. Белгили, муайян.

Орадан маълум муддат ўтиб, дарвозанинг сўнақайсиз тақиллашидан [Ҳасанали] чўчиб уйғонди. — А. Қодирий, Ўтган кунлар

Урф-одат ва анъана, гўё жадвалга ёзилгандек, маълум тартиб билан давом этди. — Ойбек, Танланган асарлар

4. Машҳур, ном чиқарган.

Маълум одам.