madaniy

sft. 1. Madaniyatga oid, madaniyat, ilm-maʼrifat bilan bogʻliq, madaniyat sohasidagi.

Madaniy inqilob. Madaniy ehtiyojlar. Madaniy meros.

Korxonada yoshlar oʻrtasida madaniy tadbirlar koʻplab oʻtkaziladi. — Gazetadan

2. Madaniyatli, madaniyatni egallagan; madaniyatga erishgan, madaniyat talablariga javob beradigan.

Madaniy odam. Madaniy oila. Madaniy qishloq. Madaniy hayot.

Koʻpchiligi ularga yoqdi xushmuomala, madaniy odamlar ekan. — Tanish basharalar

Muzey, teatrlarga qatnayman tez-tez Madaniy boʻlsin-da bu uch zumrashang! — A. Muxtor.

3. q. h. Kishi qoʻli, mehnati bilan ekiladigan, yetishtiriladigan.

Madaniy ekinlar. Madaniy landshaft.

Madaniy oʻsimliklar yetishtiriladigan tuproq togʻ jinslaridan oʻzining unumdorligi bilan farq qiladi. — Fan va turmush

Bizning moʻtadil iqlimimizda asalarilar yovvoyi va madaniy holda koʻplab uchraydi. — M. Toʻychiyev, Asalarichilik