КРУКСКОЕ НЕФТЕГАЗОКОНДЕНСАТНОЕ МЕСТОРОЖДЕНИЕ

Ўзбекистон Республикаси Бухоро вилояти Бухоро тумани ҳудудида, унча катта бўлмаган тепаликларда жойлашган, мутлақ баландлиги 235—270 м. Кон 1984 йилда очилган. Нефт ва газ захиралари ХВ-П ва ХВ-ҲП горизонтларидаги риф жинслар мажмуаси билан боғлиқ. ХВ-П горизонтда жинсларнинг пайдо бўлиш шароитлари бўйича аниқ фарқ қилувчи риф ва риф оралиғи зоналари мавжуд. Рифли зонада горизонт ётқизиқлари риф фацияли катта қалинликдаги ковакли ва ғовак-ковакли оҳактошлардан ташкил топган. ХВ-ҲП горизонт жинслари литологик таркиби бўйича ХВ-П горизонтидаги жинсларидан деярли фарқ қилмайди, сувўтли, қумоқ-қумоқ органоген оҳактошлар таркиб топган. Нефтгазконденсат уюми рифли массивнинг юқори қисмида жойлашган. Газ-нефт ва сув-нефт туташ юзалари ҳолати горизонтал бўлиб, мос равишда 2116 м ва 2160 м дан ўтади, ушбу жойларда нефтли қатламларнинг қалинлиги 44 м, газли 49 м ва нефтгазли 93 м. Кесимнинг газ ва нефтли қисми ўртача ғоваклиги мос равишда 0,17, 0,155, газ ва нефтга тўйинганлиги 0,80, 0,78, ўтказувчанлиги қатламланиш бўйича 0,464, 0,185 мкм² ва перпендикуляр ёʻналишда 0,053, 0,0797 мкм². Нефтнинг ўртача зичлиги 876,8 кг/м³. Унинг таркиби (оғирлигига нисбатан %да): олтингугурт 0,51—2,61; парафин 0,97—5,54; асфалтенлар 1,80—9,04; смола 1,75—6,79. Эркин газ таркибида метан 91,15—92,50%, унинг ҳавога нисбатан зичлиги 0,627—0,636. Газнинг таркибида (%да): азот 0,04—0,63; карбонат ангидрид гази 2,48—3,37; водород сулфид 0,13; гелий 0,02—0,0255. Газ конденсатнинг ўртача зичлиги 693,2—725,5 кг/м³, олтингугурт миқдори 0,057—0,078 %. Кондан 2002 йилнинг январигача 3152,8 минг т нефт, 949,7 минг м³ сув ва 204,6 млн. м³ ёʻлакай газ олинган. Жорий нефт бера олишлик коеффициенти 0,248 га тенг., Қуруқ нефтгазконденсат кони