Коллективное творчество

1. kollektiv ijod. Badiiy ijodga xos tushunchani ifodalovchi termin boʻlib, ikki xil maʼnoda qoʻllaniladi: 1. Xalq ogʻzaki ijodi asarlari — xalq dostonlari, ertaklari, qoʻshiqlari, maqol, matal va topishmoqlari kollektiv ijod mahsuli sanaladi. Chunki ularning haqiqiy yaratuvchisini topib boʻlmaydi. Dastlab ular ham konkret shaxs tomonidan yaratilgan boʻlsa-da, biroq vaqt oʻtishi bilan ularning ogʻizdan ogʻizga koʻchishi, qoʻshimchalar kiritilishi va sayqal topishi natijasida koʻpchilik mulkiga aylanib qoladi.

2. Baʼzan yozma adabiyotda biror asar bir necha shaxs-ijodkor tomonidan yaratilishi mumkin. Bu jarayon ham kollektiv ijod mahsuli sanaladi. Biroq yozma adabiyotda kollektiv ijod konkret xarakter kasb etadi, yaʼni yaratilgan asarning avtorlari aniq boʻladi. Masalan, oʻzbek xalqi nomidan yozilgan sheʼriy maktublar kollektiv ijod namunalaridir.