Кобзарь

qoʻbuzchi. Ukrain xalq qoʻshiqchisi. Qoʻbuzchi xalq cholgʻu asbobi — qoʻbuz (bandura) chalib, ukrain xalq tarixiy qoʻshiqlari va dumalarini kuylagan. Oʻtmishda qoʻbuzchilar maxsus kasb egasi sifatida ijtimoiy hayotda aktiv ishtirok etganlar. Kazaklarni safarga joʻnatish va kutib olish paytida tarixiy qoʻshiqlar, dumalar aytib, ularni gʻalabalarga ruhlantirganlar. Qoʻbuzchilik Ukrainada XVII—XVIII asrlarda ayniqsa rivojlandi. Ularning ijod namunalari A. Shuta, O. Veresay kabi XIX asr qoʻbuzchilaridan yozib olingan. Ulugʻ Oktyabr sotsialistik revolyutsiyasidan keyin ham qoʻbuzchilar sanʼati maʼlum vaqt davom etdi. F. Kushernik, I. Zaporojchenko sovet davrining mashhur qoʻbuzchilaridir. Ukrain klassik shoiri T. G. Shevchenko oʻzining sheʼrlar toʻplamini «Qoʻbuzchi» («Kobzar») deb nomlagan edi. Oʻz ijodida xalqning orzu-intilishlarini kuylaganligi, sheʼrlarining optimistik ruhi va revolyutsion kayfiyatiga qarab T. G. Shevchenko «ulugʻ qoʻbuzchi» deb yuritiladi.