КАРОТАЖ БОКОВОЙ (БК)

elektr karotaj usuli. Burgʻ quduq devorlariga ekran elektrodlardan perpendikulyar yoʻnaltirilgan elektr toki yordamida jinslarning zohiriy elektr qarshiligi oʻrganiladi. Ekran elektrodlari bilan oʻlchangan solishtirma elektr qarshilikka burgʻilash eritmasi va singish zonasining solishtirma qarshiliklari taʼsiri kam boʻladi. YOK 3, 7 va 9 elektrodli (K.5-rasm) zondlar yordamida oʻtkaziladi. Uch elektrodli ekranlashtirilgan zond BK-3 (K.5-rasm, a)ning markazi biroz qisqa (uzunligi 0,15 m) boʻlib silindr koʻrinishdagi tok elektrodi A₀ dan va unga simmetrik joylashgan silindrsimon elektrodlar (A₁ va A₂) dan iborat. Zondning umumiy uzunligi 3,2 m. Elektrodlar tok manbaining bir qutbiga ulanadi. Oʻlchov davrida uchchala elektrod potensiallar qiymati bir-biriga teng qilib turiladi. Elektrod A₀ dan chiqayotgan tok chiziqlari quduq devorlariga tik yoʻnalib, markaziy elektrod uzunligiga teng oʻlchamda qatlam ichiga kirib boradi. Qatlamning elektr qarshiligi quyidagi formula orqali aniqlanadi: ρ_k=KΔU/I₀, bunda ΔU — zonddan ancha uzoqda joylashgan N — solishtirish elektrodi va A₀ elektrodi orasidagi potensiallar ayirmasi; I₀ — markaziy elektrod A₀ dan oʻtayotgan tok kuchi; K-zond koeffitsiyenti, berilgan zond uchun oʻzgarmas qiymatga ega va u ABK-3 zondi uchun 0,237 m ga teng. Uch elektrodli zondlar bilan quduq devoridan 1—2 m radiusda joylashgan jinslar oʻrganiladi., Yonlama karotaj (YOK)