kamalak
камалакkamalak
ot 1. Qattiq yogʻochning bir uchidan ikkinchi uchiga ip tortib egib, yarim doira shaklida yasalgan, nayza-oʻq solib otiladigan qadimiy ov va jang quroli; yoy, kamon.
Afandi yelkasiga kamalakni osib uzoq bir koʻlga gʻoz ovlagani ketdi. — Latifalar
Ermana polvon kamalagidan devga qarab oʻq uzibdi. — Oltin beshik
2. Quyosh nurining yomgʻir, favvora tomchilarida sinishi natijasida havoda turli rangda yarim doira shaklida koʻrinadigan yoʻl; yoy.
Daraxtlarning orqasida qizil, koʻk, pushti va zangor chiziqlar bilan tovlanib turgan kamalak koʻrindi. — I. Rahim, Ixlos
- Kamalak boʻlmoq Kamalak shaklini olmoq, egilmoq. Qoshlar uchadi, koʻzlar kuladi, goh chap qoʻl orqa belga oʻtib, oʻng qoʻl qosh ustida kamalak boʻladi. — M. Ismoiliy, Fargʻona tong otguncha
- Kamalak qilmoq Kamalakka oʻxshatib egmoq. Rais., bir qoʻlini orqasiga qoʻyib, ikkinchi qoʻlini boshi uzra kamalak qilib, ikki-uch yelka qoqdi-da, shunday yoʻgʻon gavdali boʻlishiga qaramasdan, bedanaday yoʻrgʻaladi. — A. Qahhor, Qoʻshchinor chiroqlari