Изосиллабизм

izosillabizm, teng hijolilik. Biror sheʼriy parchadagi misralararo hijolarning teng miqdorda boʻlishi. Izosillabizm koʻproq sillabik sheʼrga xos boʻlib, unda sheʼriy misralardagi hijolarning maʼlum nisbatda qatʼiy tengligi asosiy rol oʻynaydi. Shuning uchun ham izosillabizm sillabik sheʼr tuzilishiga asoslangan oʻzbek xalq poetik ijodi hamda oʻzbek sovet sheʼriyatida koʻp uchraydigan hodisadir. Oybekning «Naʼmatak» sheʼridan keltirilgan quyidagi band misralari 11 hijodan tuzilganligi uchun ham bu band izosillabizmga misol boʻla oladi: Nafis chayqaladi bir tup naʼmatak — 11 Yuksakda, shamolning belanchagida. — 11 Quyoshga koʻtarib bir savat oq gul, — 11 Viqor-la oʻshshaygan qoya labida — 11 Nafis chayqaladi bir tup naʼmatak. — 11 Izosillabizm sheʼrning ritmik ohangdorligi hamda taʼsirchanligini oshirib, oʻquvchi xotirasida mustahkam saqlanib qolishini taʼminlashga yordam beradi.