Интрига

intriga. Epik yoki dramatik voqealarning murakkab ziddiyatlar asosiga qurilishi. Intriga zid tomonlardan birining ongli xatti-harakati natijasida yoki tabiiy shart-sharoit natijasida yuzaga kelishi mumkin. Intriga voqealar rivojidagi dramatizmning keskinlashuviga, biror xarakterga xos xislatlarning toʻlaroq namoyon boʻlishiga yordam qiladi va yozuvchi ijodining gʻoyaviy yoʻnalishini aniqlab beradi. Odil Yoqubovning «Ulugʻbek xazinasi» tarixiy romanidagi Ulugʻbek bilan Eshon Ubaydulla, xoʻja Ahror hamda shayx Nizomiddin Xomush taʼsirida boʻlgan shahzoda Abdullatif oʻrtasidagi ziddiyat intrigaga yaqqol misol boʻladi. Yoki Abdulla Qodiriyning «Mehrobdan chayon» asaridagi xon mirzolari oʻrtasidagi munosabatlar ham intrigaga asoslangan. Asardagi voqealar rivojining shiddatli kechishi, keskinlik va dramatik taranglik intriga vositasida yuzaga keladi.