Импровизация

— improvizatsiya, badiha. Oldindan maxsus tayyorgarlik koʻrilmay, ijodkorning biror voqea yoki narsadan taʼsirlanishi yoxud ilhom olishi bilan bogʻliq boʻlgan ijodiy jarayon. Binobarin, oldindan tayyorgarlik koʻrmay sheʼr aytgan yoki muzika asari yaratgan ijodkor improvizator, badihagoʻy terminlari bilan ifodalanadi. Improvizatsiya koʻproq xalq ijodchilariga xos xususiyatdir. Improvizatsiya ijodkorning isteʼdodi, soʻzga chechanligi, shuningdek, uning ijod paytidagi ruhiy holati, xotirasi bilan ham bogʻliq jarayondir. Shuning uchun bir xalq ijodkoridan turli vaqtlarda yozib olingan bir asarning oʻzi turli hajmga, turlicha badiiylik darajasiga ega boʻladi. Yozma adabiyotda improvizatsiya koʻproq mushoiralarda qoʻl keladi. Yozma adabiyotdagi badihaning goʻzal namunalaridan biri Roʻdakiyning: Boʻyi joʻyi Moʻliyon oyad hame, Yodi yori mehribon oyad hame,— deb boshlanuvchi gʻazalidir.