гўдак

от 1. Эмадиган, кўкракдан ажратилмаган, одатда бир ёшгача бўлган бола; чақалоқ.

Оилада туғилса гўдак, Унга суйиб қўярлар исм. — А. Орипов

Эсли болалар ҳам кўринмайди. Гўдаклар эса бешикда, дарахтлар орасидаги беланчакларда ухлаб ётишади. — Ойбек, Танланган асарлар

2. Вояга етмаган, она сути оғзидан кетмаган бола, ёш бола.

Мусулмонқул ўзини мингбоши эълон қилиб, ақлсиз бир гўдакни хон кўтариб, эл елкасига минди. — А. Қодирий, Утган кунлар

Ўқитувчи ёлғиз билим бермайди. У гўдакни одам қилади. — Н. Сафаров, Оловли излар

3. кўчма Етарли турмуш тажрибасига эга бўлмаган, хом, ғўр одам.

Баринг гўдак, ҳали нодон боласан, Ҳар иш қилсанг ҳам, битмаган, чаласан. — Равшан

Дилдор Аъзамжонни кўрди-ю, Низомжон кўзига бир ёш бола, гўдак бўлиб кўринди-қўйди. — С. Аҳмад, Уфқ