ғирром

сфт. 1. Иш, ҳаётда ҳалоллик, покликка риоя қилмайдиган, унга зид иш юритувчи; нопок, муттаҳам.

Яхши ишласангиз, бас, ака-ука бўлиб кетамиз. Лекин, айтиб қўяй, ғирромларга тобим ёʻқ. — Э. Носиров, Топширилмаган совға

кичик хўжайинлар базани хомталашга олганлар. Қайси бирлари олғирроқ ва ғирромроқ бўлса, шуниси кўпроқ кўтарган. — Х. Тўхтабоев, Қалпоқ йиртилди

Етук олим бўлишни истаган одам ҳаром ва ғирром ёʻлга кирмаслиги керак. — Газетадан

2. Ўйин, мусобақа, беллашувда тартиб-қоидага зид ёʻл тутувчи; ҳалолликка риоя қилмайдиган, нотанти.

Шахматнинг яна бир зарари шуки, агар ғирром одам билан ўйнасангиз, асабингиз бузилади. — А. Қаҳҳор, Асарлар

Бел олишганда кураш майдонида, Ғирром-у нотанти полвон чаладир. — Ҳабибий

3. Ўзбек кураши атамаларидан бири: беллашув пайтида катта хатога ёʻл қўйган ёки такрор қўполлик қилган курашчига охирги огоҳлантириш сифатида қўлланади.