gʻijim
ғижимgʻijim I
sft. Buklanib, ezilib, taxi, tekisligi buzilgan.
[Akbarali] Gʻijim qogʻozni kafti bilan yana tekislab, yana oʻqidi, ikkinchi anketani ham olib, solishtirib oʻqidi. — A. Muxtor, Chinor
Togʻoraga solib yuvsangiz ham, gʻijim boʻlmaydi, materiali juda pishiq. — N. Aminov, Qahqaha
Gʻijim koʻylakni kiymaydi, botinkasini uzoq ishqalab tozalaydi. — A. Muxtor, Kumush tola
- Gʻijim baxmal (yoki duxoba) Baxmalning tuklari bir tekis, silliq boʻlmasdan, gʻijimlangan kabi tovlanib turadigan xili. Magazindan oʻn metr gʻijim duxoba oldim.Muhabbat bir kiyim gʻijim baxmal olib chiqadi, Turgʻun choʻt urish bilan ovora. — N. Safarov, Hayot maktabi
- Gʻijim roʻmol Gʻoʻzapoʻchoq shaklida boʻrtiq naqshlar solib toʻqilgan ipak roʻmol. Gajak qoʻygan kelinchaklar, gʻijim roʻmol oʻragan qizlar fotografiya oldida oʻralashib qolishadi. — S. Ahmad, Ufq
gʻijim II
sft. s. t. Siqim, changal.
[Nusratilla] Belidagi bir qiyigʻini jahl bilan shartta yechib, bir gʻijim pulni yaltiroq gʻisht ustiga sochdi. — A. Muxtor, Opa-singillar