эфир

от 1. эск. физ. 19-асрдан то 20-асрнинг 20-30-йилларигача ўтган физикларнинг тасаввурига кўра, юлдузлараро, планеталараро олам фазосини ва моддалардаги атомлараро, молекулалараро бўш жойларни тўлдирган қандайдир муҳит.

2. Осмоннинг, жаҳоннинг радиотўлқинлар тарқаладиган муҳитининг умумлашма номи.

Эфирга чиқмоқ. Эфирда эшиттирмоқ. Эфирдан келган хабар,

Сен эй, сарҳад билмас эфир мавжлари, Дунёга ёй: Бугун қутлуғ айём, де. — Миртемир

3. ким. Қўшалоқ углеводород гуруҳдан иборат хушбўй суюқ органик моддаларнинг умумий номи (тиббиётда эт ўлдирувчи дори, техникада эритувчи сифатида ишлатилади).

Содда эфирлар. Этил эфир,

Кучли таъсир этадиган дориларнинг кўпи эфир ва алкогол билан аралаш ҳолда тайёрланган бўлади. — Н. Исмоилов, Касалларни парвариш қилиш