chipta

ot 1. Dagʻal buyumlar toʻqish uchun tayyorlangan yupqa tilim-tilim poʻstloq va undan toʻqilgan narsa.

Nariroqda atrofi chipta devor bilan oʻralgan qoʻra. — Sh. Xolmirzayev, Ogʻir tosh koʻchsa

2. Odatda tokni bagʻazlarga tarab bogʻlash uchun ishlatiladigan poʻstloq tolasi.

Chipta bilan bogʻlamoq.

ot 1. s. t. Poyezd, avtobus, samolyot kabi transport vositalarida yurish, uchish huquqini beruvchi bilet.

Mana bu gapni eshiting, Andijonga borganimda, Maksimka poyizga [poyezdga] chipta ololmay, nachaylikning [nachalnik — boshliqning] oldiga kirdim. — S. Ahmad, Hukm

2. Biror tomoshaxonaga yoki turli sport musobaqalari oʻtkazilayotgan joyga kirish huquqini beradigan rasmiy qogʻoz; bilet.

Paxtakorning oʻyiniga chipta qolmabdi.