changal
чангалchangal I
ot 1. Panja, chang.
Burgut changali. Ayiq changali.
Birdan Poshsha xola changalini yozib, Yigitaliga qaradi. — D. Nuriy, Osmon ustuni
2. Koʻchma Iskanja.
U dadasini hech qachon bunchalik gʻam va iztirob changalida koʻrmagan edi. — Sharq yulduzi
3. Siqimga sigʻarli narsa, bir siqim.
Yogʻochga qistirib qoʻyilgan isiriqdan bir changal solib chiqdi. — Sh. Xolmirzayev, Ogʻir tosh koʻchsa
- Pul boʻlsa, changalda shoʻrva
- Changal solmoq Lekin Toʻravoy [dushman oʻqiga] burgutdek chap berdi va bir sakrab, uning boʻgʻziga changal soldi. — N. Safarov, Olovli izlarHa, leytenant, urush hammaning baxtiga changal soldi. — H. Gʻulom, Toshkentliklar
- Oʻlim changali Oʻlim xavfi, oʻlim iskanjasi. Meni oʻlim changalidan sugʻurib olgan ofitserning kim ekanligini soʻrab bilib olmaganligim uchun oʻzimni kechira olmayman. — N. Safarov, Olovli izlar
changal II
ot 1. Tikanli butalar, oʻsimliklar.
Yantoq yogʻ oʻrnini bosmas, Changal — bogʻ. — Maqol
Ular chapga burilib, oʻt bosgan katta ariqdan yigirma-oʻttiz qadam yurgach, toʻp-toʻp changal boshlandi. — O. Yoqubov, Er boshiga ish tushsa
2. ayn. Changalzor.
[Yoʻlbars] Mangu qochar, qochar togʻlardan, Oʻrmonlardan, changal, toʻqaydan. — Sh, Rahmon