butamoq

fl. 1. Daraxtning keraksiz shox-shabbalarini kesmoq.

Butamasang —meva oz, Butasang — yeysan qish-u yoz. — Maqol

Sidiqjon shitob bilan daraxt butar ekan, Kanizakni izlab, atrofga koʻz tashladi. — A. Qahhor, Qoʻshchinor chiroqlari

Nurxon narvonga minib, tut butamoqda. — O. Yoqubov, Larza

2. koʻchma Kesmoq, oʻldirmoq.

Boy katta boshini kichik qilib chiqqanda, oʻylab oʻtirmasdan, qoʻlidagi daskalla bilan shartta oʻsha boshni butab tashlabdi. M. — M. Doʻst, Lolazor

Togʻay uning basharasiga tikilib turarkan, koʻnglida shu istakni tuydi: qani endi bu surbetni butab tashlasa — Yoshlik

3. Kiyintirmoq, ustini but qilmoq.

Ikki-uch kun ichida usti-boshini aytganingizdek butab qoʻyaman. — P. Tursun, Oʻqituvchi

son-sanoqda yoʻq kishilarga yil oʻn ikki oy ovqat yedirib, ust-boshini butab, kiyim-kechak beramiz — M. Oʻrinxoʻjayev, Unutilmas kunlar