бебошвоқ

от 1. Бўшатиб, ечиб юборилган, бошвоқсиз.

Бебошвоқ мол.

Сигир жониворни йил-ўн икки ой бебошвоқ қўйдингми — тамом, ундан қўлингни ювиб, қўлтиғингга уравер. — Ў. Умарбеков, Юрак сўзлари

Бизнинг даргоҳга яқин жойда икки яшар чамали бир ола танача бебошвоқ ўтлаб юрар эди. — Ғ. Ғулом, Шум бола

2. кўчма айн. Бебош 3, 4, 5, 6.

Бетончиларимиз орасида бир-иккита бебошвоқ болалар бор, улар кўпинча одамларни ишдан қўйиб, сандироқлаб юради. — Ш. Ғуломов, Ёрқин уфқлар

Азизхон элга нафи тегмайдиган бебошвоқ йигит. — У. Норматов, Талант тарбияси

Чақмоқдай бебошвоқ, тошқиндай бераҳм, Лекин кўзларингда бир олам ҳаё. — Миртемир