банорас

от 1. Материали, тўқилиши ва пишиқлиги жиҳатдан беқасамга ўхшаш, аммо гуллари билан фарқланувчи, қўлда тўқилган газлама.

Банорас тўн. Банорас паранжи. Банорас чопон.

Эгнида қизғиш банорас тўн. — С. Сиёев, Аваз

Эгнимга оқ дока кўйлак, оқ банорас нимча кийгизиб, бошимдаги дўппи ўрнига оқ дока рўмол ўратдилар. — Ойдин, Ҳикоялар

— Сизни ҳар замонда извошда духоба, банорас паранжиларда кўриб қолардик, — деди Ўғилой опа. — С. Юнусов, Кутилмаган хазина

2. кўчма Банорас рангидек кумушранг оқ тусли, шунингдек, оч пушти, сариқ, яшил рангли.

Атроф зим-зиё, фақат тиниқ, банорас осмоннинг у ер-бу ерида юлдузлар милтиллайди. — Ҳ. Ғулом, Тошкентликлар

Осмон гардишининг туби аста-секин ёришиб, банорас уфққа қизғиш ранг ёйила ётибди. — Ҳ. Ғулом, Замин юлдузлари

Осмон жуда тиниқ, банорас экан. — А. Мухтор, Чинор