Qidiruv

sft. 1. Jismonan baquvvat, bahodir, botir, pahlavon.

Har biri mingga tenglashadigan zoʻravon edi. — Bahrom va Gulandom

2. Zolim, zulm oʻtkazuvchi hukmdor.

Agar u [Bobur] Samarqanddan voz kechsa, narigi zoʻravonlar poytaxtni olishi, keyin Andijonga bostirib kelishi muqarrar ekani unga hozir juda aniq sezilmoqda edi. — P. Qodirov, Yulduzli tunlar

3. Umuman, oʻzgalarga qonunsiz ravishda kuch ishlatuvchi, zoʻrlik qiluvchi shaxs.

Yoʻlchi bir sakrashda zoʻravonning oldiga bordi, toʻpponcha tutgan qoʻlini mahkam siqib, orqaga qayirdi. — Oybek, Tanlangan asarlar

Xoʻsh, zoʻravon sizmi yo bu bechora, bekas, benavo shoirmi? [dedi Zavqiy]. — K. Yashin, Hamza

ot Zoʻravonlarga xos xatti-harakat; zoʻrlik, kuch ishlatish.

Zoʻravon-lik qilmoq.

Avazxon, bu qanday zoʻravonlik! Axir, toʻra degan kambagʻalni ezaveradimi? [dedi Pirnafas aka]. — J. Sharipov, Xorazm

U oʻz kuchiga juda ishonar ekan, zoʻravonlik bilan yashayapman, zoʻravonlik bilan sayohat ham qilaman, deb oʻylabdi. — I. Rahim, Chin muhabbat

Toshkentda bir moʻgʻul beki bechora kosibning qizini zoʻravonlik bilan tortib olmoqchi boʻlganda, men chidab turolmadim. — P. Qodirov, Yulduzli tunlar

policy of force