ot 1. Daraxt, ogʻoch.
Otabek hovlining oʻrtasida, tut yogʻochining yoniga kelib toʻxtagan va janubda kishi yoʻqmi, deb alanglar edi. — A. Qodiriy, Oʻtgan kunlar
2. Yogʻochdan qilingan, yogʻochli.
Esimda Anhorning yogʻoch koʻprigi, Bu yerni azaldan deyishgan Oʻrda. — M. Shayxzoda
Yogʻoch uyga yerdan bir qancha baland koʻtarib taxta terilgan, uning ustiga qanor qoplardan palos toʻshalgan. — I. Rahim, Chin muhabbat
— Qosimov mast emasmidi? — dedi Solibek qiziqib. Uning ham kayfi bor-u, ammo Gʻulomjonga oʻxshab yogʻoch kavush kiygan emas. — H. Nuʼmon, Fasllar
3. Qurilish materiali, xoda.
Sidiqjon onasi kutgandan ham ortiqroq gʻayrat qilib, hash-pash deguncha yogʻoch, somon, boʻyra, taxta va boshqa narsalarni tashib oldi va tezdan usta soldi. — A. Qahhor, Qoʻshchinor chiroqlari
- Yogʻoch oyoq 2. Yogʻochdan qilingan yasama oyoq, protez. Masxarabozlar yogʻoch oyoqda raqs tushish, olovbozlik, nayrangbozlik, muallaqchilikda mohir boʻlgan. — M. Qodirov, Oʻzbek xalq ogʻzaki dramasi;Ikrom-jon yakka oyoqda kezishdan foyda yoʻq, deb yogʻoch oyogʻining uchiga eski etikning tag charmini qoqib olgandi. — S. Ahmad, Ufq
- Yogʻoch ot Choʻpdan yasalgan bolalar oʻyinchogʻi. Bir kun Qudrat suv sepib turgani ustiga oʻzidan bir yashar katta boʻlasi ichkaridan yogʻoch ot minib chiqib qoldi. — M. Ismoiliy, Fargʻona tong otguncha
- Sim yogʻoch Solih goh u yoqqa, goh bu yoqqa gandiraklab ketar, devorga, sim yogʻochga suyanib qolardi. — H. Nazir, Yonar daryo