Qidiruv

ot 1. Yerning Quyosh atrofida bir marta aylanib chiqish muddati; oʻn ikki kalendar oyiga teng vaqt, shunday vaqtga teng oʻlchov.

Oʻtgan yil. Bu yil. Yilning toʻrt fasli.

2006-yil uchun obuna davom etmoqda. — Gazetadan

Bu yil yogʻin-sochin koʻp boʻlib, yer-koʻk chamanday yashnab ketdi. — S. Siyoyev, Yorugʻlik

2. Biror hodisa, voqea yuz bergan kundan boshlab oʻtgan oʻn ikki oylik vaqt.

Uning ishga kirganiga besh yil boʻldi.

Uchinchi otam bilan ikki yilcha yaxshi turishdi. — Oʻ. Hoshimov, Qalbingga quloq sol

3. Oʻn ikki oylik vaqt bilan hisoblanadigan kalendar tizimi.

Milodiy yil. Hijriy yil. Kabisa yili. Quyosh yili. Oy yili. Qamariya yil hisobi.

4. astr. Biror planetaning Quyosh atrofida bir marta aylanishida oʻtadigan muddat.

Mars yili (687 sutkaga teng),

Zuhra yili (225 sutkaga teng).

5. tar. Muchal yil hisobida oʻn ikki muchalning har biri (

U qoʻy yilida tugʻilgan. — Yiling nima? —Yilim — sichqon.

Bu yil it yili ekanmi, bilmayman. Kulollikda ham meni itlar tinchitmadi. — Gʻ. Gʻulom, Shum bola

6. eti. q. Yil oshi.

Xaldorbekovning yili oʻtar-oʻtmas, boyvachchaga kenja xotin boʻlib tushgani mahalla-koʻy oʻrtasida ancha noxush gap-soʻzlar uygʻotgan edi. — K. Yashin, Hamza

ot ayn. Jilgʻa.

Oʻktam Frontda oʻq doʻllari orasida daryolarni, necha-necha yilgʻalarni suzib oʻtgan edi. — Oybek, Oltin vodiydan shabadalar

1. Yilga oid.

Bu yilgi paxta terim kampaniyasi. Oʻtgan yilgi xatolar takrorlanmasin.

[Aravakash:] — Bu — oʻtgan yilgi, uzoq yilgi paxtalar, — deb javob qilardi. — M. Ismoiliy, Fargʻona tong otguncha

Uch kun ichida uch yilgi kasalday boʻlib qolibsan. — Oybek, Tanlangan asarlar

2. Yuz yilgi gap

3. 1) avval boʻlib oʻtgan voqea-hodisalar, eski gap-soʻzlar;

4. 2) aytilaverib siyqasi chiqqan gap.

ot 1. Otlar podasi; otlar; uyur.

Barchin otasining toʻqson toʻqay yilqisidan oʻn otni saylab oldi. — Alpomish

Yilqi, poda, suruvlar dard koʻrmay oʻssa deyman. — Q. Muhammadiy

2. Umuman, ot.

Birovi yillab saqlagan yilqi moyi topib kelib, toʻpigʻimni silaydi — S. Siyoyev, Yorugʻlik

Yiliga baylashilgan, yillik qilib shartlashilgan, bir yil davomida yoki bir yilda bir marta haq toʻlanadigan.

Yilbay ish. Yilbay haq.

Mirzakarimboy oʻylab qoldi: Keyin, qozoq, qirgʻizdan kishi bahra topadi. Yilbay qilib sahrodan keltirasan. — Oybek, Tanlangan asarlar