Қидирув

от 1. бот. Зах ва серсоя ерларда, тўқайларда тола-тола бўлиб ўсадиган бир ёки кўп йиллик ўсимлик (толаси пишиқ бўлганлигидан, одатда, боғдорчиликда ток боғлаш учун ишлатилади)

Якан ўрмоқ. Токни якан билан боғламоқ.

Кўлнинг саёз жойларида одам бўйи қамишлар, яканлар ўсиб ётарди. — Ж. Шарипов, Хоразм

2. жарг. Пул.

Эсинг борида этагингни ёп, деган машҳур нақлга амал қилмасак бўлмас. Бир ёқдан яканнинг қўри қочяпти. — Ж. Абдуллахонов, Тўфон

Гапни айлантирманг. Ёғлиқ жой. Якан катта бўлади! — Муштум

от Эски-туски нарсалар билан савдо қилувчи; ёймачи.

Шаҳарнинг Ожар кўчасидаги узун тор бозор ҳам ўзига хос, қизиқ Мискар кулолчилар ҳам, яканчилар ҳам маддоҳлар ҳам — ҳаммаси шунда. — Ҳ. Қодирий, Қоҳира лавҳалари

от Узун бир қават кўрпача.

Тошхон тахмондан якандоз олиб тўшади. — Р. Раҳмонов, Келин

— Мингбоши мени юқорига — икки қават якандозга таклиф қилди, — деди Шокарим. — Ш. Ризо, Қор ёғди, излар босилди

от Яканчи иши.