Қидирув

от 1. Аёлларга ҳурмат юзасидан мурожаат қилганда қўлланадиган сўз.

Қудамиз Мирзакарим қутидорга ва қудачамиз хонимга етиб маълум бўлгайким, бизлар бунда соғ-саломатдирмиз. — А. Қодирий, Ўтган кунлар

2. Ҳурмат юзасидан аёллар исмига қўшиб айтилади, масалан,

Мукаррама хоним, Тамара хоним, Ҳалима хоним.

Ой юзли рафиқам, қундуз қошли маъшуқам Кумуш хонимга! — А. Қодирий, Ўтган кунлар

3. с. т. Гўзал, барно аёл; хушбичим жувон.

Ҳой-ҳой, хоним, ёʻл бўлсин, Қаерга ёʻрғалайсиз! — Қўшиқлар

от 1. тар. Туркий ва мўғул халқлари ҳукмдорлари унвони.

Қўқон хони. Хон саройи.

[Мулла Фазлиддин:] Тошкент хони Маҳмудхон ҳам бизга қарши қўшин тортиб келмоқда эмиш. — П. Қодиров, Юлдузли тунлар

2. тар. Хонлик қилган, хон лавозимидаги шахс исмига қўшилиб, унвон ифодалайди.

Баҳодирхон — Хивада, Худоёрхон — Қўқонда хонлик қилган.

3. Эркак ва аёллар исмига қўшилиб, ҳурматни ифодалайди.

Оқилхон, Каримахон.

от 1. Тураржойнинг алоҳида ажратилган ҳар бир бўлими; бўлма.

[Қизнинг] Кўзларига яна ёш қуйилиб келди-ю, чопиб бориб, ўз хонасига кирди. — Ў. Ҳошимов, Қалбингга қулоқ сол

Овқатдан сўнг бир оз телевизор кўриб ўтиришди. Кейин ота-болага шу телевизорли хонага жой солиб беришди. — Ў. Усмонов, Сирли соҳил

2. Корхона, ташкилот, муассасаларда муайян мақсад учун ажратилган алоҳида жой; бўлма.

У [Азиза] деворига ҳар хил диаграммалар, портретлар илиб ташланган ўқитувчилар хонасидан ўтиб эшикни тақиллатди. — Ў. Ҳошимов, Қалбингга қулоқ сол

Бош врачнинг хонасида ўтирган икки киши профессорни кўриши билан ўрнидан турди. — С. Юнусов, Кутилмаган хазина

3. Айрим буюм ёки организмларнинг ичида бирор нарса жойлашадиган (етишадиган ёки сақланадиган) чуқурча, ўйиқ.

Ари уя хоналари. Ғўзапўчоқ хонаси.

Унинг товуши ёʻғонлашди, кўзлари хонасидан чиқаёзди, юзлари тиришиб, хунук аломатлар пайдо бўлди. — Ҳ. Турсунқулов, Ҳаётим қиссаси

Бунча сочилган ҳарфни жой-жойига қўйиш, қайси хонада қандай ҳарф туришини билмаган Саидий учун кўп қийин иш эди. — А. Қаҳҳор, Сароб

4. мат. Ўнли саноқ системасида ёзилган натурал сонда қатнашган рақамлар ўрни.

Khanka.

сфт. 1. Қўлда тайёрланган; қўлда қилинган.

Хонаки нон. Хонаки туфли.

Дастурхонда хонаки печенелар, атиргул нусха торт ва турли хил мевалар бор эди. — С. Аҳмад, Қадрдон далалар

2. с. т. Махсус тайёрланган; қўлбола.

Хонаки чой дамламоқ. Хонаки палов қилмоқ.

3. Уйда, хонадонда боқиладиган; парвариш қилинадиган; қўлга ўргатилган.

Хонаки ит. Хонаки гул. Хонаки ўрдаклар.

Бу шифобахш ўсимликни [алоени] истаган ҳар бир киши хонаки қилиб ўстириши мумкин. — Саодат

4. Хона ёки уй ичида бўладиган, уйда бажариладиган.

Хонаки базм. Хонаки иш. Хонаки ҳунар.

Сотиболди тирикчилик учун хонаки бир касб қилишга мажбур бўлди — ҳар хил саватчалар тўқишни ўрганди. — А. Қаҳҳор, Бемор

сфт. 1. Маълум миқдорда хонаси бор.

Бектемир дўстлари Дубов, Асқар полвон ва бошқа бир неча жангчилар билан икки хонали бир уйга жойлашди. — Ойбек, Қуёш қораймас

Ота-она вафотидан сўнг у истиқомат қилаётган уч хонали уй карвонсаройга айланди. — Газетадан

Бир хонали пакана уйин Ёритади ёниб жинчироқ. — Ҳ. Пўлат

2. Маълум миқдордаги катаги ёки бўлмачалари бор; катакли (жадвал, дафтар, шахмат тахтаси, босмахона яшиги ва шу кабилар ҳақида).

Шахмат тахтаси олтмиш тўрт хонали бўлади. Ўн олти хонали яшик.

3. мат. Маълум миқдордаги хонага эга (

Уч хонали сон. Беш хонали сон.

100 дан 999 гача бўлган сонлар уч хонали сонлардир. — Математика