фл. 1. Бирор нарсага ўзида эҳтиёж сезмоқ, унга эришишни истамоқ.
Меъморни ўз ҳолига қўйиб бериш керак. У шуни хоҳларди. — Мирмуҳсин, Меъмор
Насибанинг ўзи ўқишни хоҳламаса, ҳеч кимга гап тегмайди. — А. Қаҳҳор, Оғриқ тишлар
Ёши ортиб бораётган ҳар бир қиз, ҳар бир жувон сингари Тўрахон бола кўришни хоҳлар эди. — М. Исмоилий, Фарғона тонг отгунча
2. Ўз хоҳиши билан танламоқ, рози бўлмоқ (қиз ёки йигит ҳақида).
[Она қизига:} Унга ёʻқ дейсан, бунга ёʻқ дейсан, кимни хоҳлайсан ўзи? Ё биронта билан гап бериб юрибсанми? — Ёшлик
Мен Азимжон акамни хоҳладим, яхши кўраман, тегмасам ўламан дегани ёлғон экан-да? — М. Исмоилий, Фарғона тонг отгунча
- Худо хоҳласа Гап бошида қўлланиб, муайян ният албатта амалга ошсин, деган мазмунни билдиради. Худо хоҳласа, ўзингиз ёр-ёр айтиб, гўшангага ўзингиз олиб кирасиз. — Х. Тўхтабоев, Ширин қовунлар мамлакати