Поиск

ot 1. Boʻyi va eni maʼlum hajmga ega boʻlgan, asosan yozish uchun ishlatiladigan qogʻoz, qogʻoz boʻlagi.

Ertoyev stol tortmasidan bir varaq qogʻoz olib, nimalarnidir tez yozdi. — O. Yoqubov, Er boshiga ish tushsa

U bir varaq qogʻozga tajribaning formulasini shosha-pisha yozib koʻrsatdi. — Oʻ. Hoshimov, Qalbingga quloq sol

2. Daftar, kitob va shu kabilarni tashkil etuvchi old-.orqa sahifadan iborat har bir qat, boʻlak.

Oʻz karavotida yonboshlab olib, kitob oʻqiyotgan Zulayho varaqlarni shitirlatib ochayotganida, unga qarab-qarab qoʻyar, ammo indamasdi. — Oʻ. Hoshimov, Qalbingga quloq sol

Ahmad varaqning uchini buklab, jurnalni yopdi. — F. Musajonov, Himmat

Mashhur xattotlar katta pullar evaziga koʻchirgan, har bir varagʻiga nafis bezaklar ishlangan bu qoʻlyozma kitoblarning har biri bir necha ming dinor turishini Boburning yonida turgan Qosimbek ham bilar edi. — P. Qodirov, Yulduzli tunlar

3. koʻchma Oʻtmish hayot, tarixning muayyan davrlari, qismlaridan har biri, sahifasi.

Uzilmasin zamonning rishtasi deya, Asrlarning orasi qolmasin deb boʻsh, Yemasin deb tarixning varagʻin kuya, Qullikka erk tilagi kerib turdi toʻsh. — M. Shayxzoda, Toshkentnoma

ot 1. Muhim bir gap, matn bosilgan va ommaga tarqatish uchun moʻljallangan qogʻoz; ijtimoiy-siyosiy tashviqot vositalaridan biri.

Tashviqot varaqasi.

Raisa shu atrofdagi qishloqlarga borib, aholi oʻrtasida varaqalar tarqatar, dushman haqida maʼlumotlar olib qaytardi. — I. Rahim, Chin muhabbat

2. Maʼlum bir narsalar haqida maʼlumot yozish uchun belgilangan rasmiy qogʻoz, blanka.

Kasallik varaqasi. Mukofot varaqasi.

[Otaxon] Tortmadan roʻyxat varaqasini oldi. — Gazetadan

Kadrlar boʻlimidan shaxsiy varaqangizni oldirdim. — Yoshlik

sft. Yupqa yoyilgan varaq-varaq yogʻli xamir ichiga qiyma solib, yogʻda pishirilgan taom; somsaning bir turi.

Oftob oyim varaqi pishirishdan bu kungi mehmonning uncha-muncha kishi boʻlmaganligini bildi. — A. Qodiriy, Oʻtgan kunlar

Patnislarda, togʻoralarda qovurma chuchvara, varaqi, qatlama va boshqa har nav meva-chevalar. — Oybek, Tanlangan asarlar

sft. Varaqlari bor, maʼlum miqdordagi varaqsan iborat boʻlgan.

Yuz varaqli kitob. Oʻttiz varaqli qoʻlyozma.

ot esk. Qurʼon oyat va suralarini yoddan bilmaydigan, faqat kitobga qarab oʻqiydigan chalamullalarni anglatadi.

Mullaning yomoni — varaqchi, odamning yomoni — qaroqchi. — Maqol

fl. 1. Kitob, daftar va shu kabilarning varaqlarini birma-bir ochmoq.

Jurnalni varaqlamoq. Albomni varaqlamoq.

Botirali qizning daftarlarini chiroqqa yaqinroq tutib, birma-bir varaqlab koʻrdi. — H. Gʻulom, Mashʼal

2. koʻchma Tarix, hayot varaqlarini xayoldan (nazardan) oʻtkazmoq.

Asta varaqlayman oʻtgan kunlarni — Rauf Parfi