Поиск

ot 1. Narsalarning yuqori tomoni; tepa; zid. past.

Usti ochiq aravaga yuklar ortildi. — Oybek, Tanlangan asarlar

Yassi qora stollarning yon-veri odamga, usti esa uyum-uyum kitobga toʻla. — P. Qodirov, Uch ildiz

Erining yordamida xontaxta ustini shirinliklardan boʻshatdi. — S. Anorboyev, Oqsoy

Doʻkonxona burchagida usti yeyilgan, tekis kosib toʻnkasi — Oybek, Tanlangan asarlar

2. Ichga qarama-qarshi tomon; sirt.

Paltoning usti. Idishning usti.

[Gulsumbibi] Usti koʻk sirli katta chelakni olib, sigir soqqani ogʻilxona tomon ketdi. — Oybek, Tanlangan asarlar

Sidiqjon etikni chiroqqa solib, ustini, ichini koʻrdi. — A. Qahhor, Qoʻshchinor chiroqlari

Saodatxon ustiga hech narsa yozilmagan, yelimlangan konvertni portfeliga solib qoʻydi. — S. Zunnunova, Yangi direktor

3. Koʻchma Kiyim, kiyimlar majmui; ust-bosh.

Usti yupun, qorni och, ozgʻin bola uning oʻzi emasdek tuyuldi. — P. Tursun, Oʻqituvchi

Shu ham bahonami? Usting but, qorning toʻq. Qordan qoʻrqasanmi?! — E. Raimov, Ajab qishloq

4. koʻchma Zimma, masʼuliyat.

Hokim tekshirib, hech bir natija chiqara olmagandan keyin, aybni karvonsaroy qorovuli ustiga qoʻyadi. — Sh. Zunnun, Hiylakor oʻgʻri

Bu yoʻlda qancha zarba boʻlsa, ustimga olishga hozirman. — Sh. Rashidov, Boʻrondan kuchli

5. 3-shaxs egalik va joʻnalish, oʻrin-payt va chiqish kelishiklari affikslari bilan (ustiga, ustida, ustidan) koʻmakchi vazifasida makon, payt, obyekt kabi munosabatlarni ifodalaydi.

Meʼmor aravadan tushib, bir muddat boʻlsa ham maysa ustiga yonboshladi. — Mirmuhsin, Meʼmor

Qoʻrgʻonbegi ot ustida qoʻrgʻonning u boshidan bu boshiga chopardi. — A. Qodiriy, Oʻtgan kunlar

Choy ustida eri ruhiyasini kuzatadi, uning nechundir kayfi buzuq — Mirmuhsin, Topilgan husn

Pastda qamishzor botqoqlik va uning ustidan oʻtgan uzun yogʻoch koʻprik bor edi. — P. Qodirov, Yulduzli tunlar

Domla ikki shisha pivoning ustidan yuz gramm aroqni bitta otib, oʻrnidan turdi. — A. Qahhor, Toʻyda aza

Buning ustiga, bunisi yetishmaganday.

Tushda ishtaha boʻlmay, qovun bilangina tahammul qilganlaridan, qorin och, buning ustiga-ustak jazirama oftob. — I. Qalandarov, Shoxidamas, bargida.

rvsh. Ish-harakatning takrorlanishini ifodalaydi; birin-ketin, ustma-ust.

Kuch oladi qarsak qalblardan, Ust-ustiga tushadi xitob. — E. Rahim.

Eshik qoʻngʻirogʻi ust-ustiga jiringlab, xolaning xayolini boʻldi. — Guldasta

ot 1. Biror kasb-hunar bilan shugʻullanuvchi malakali mutaxassis.

Soatsoz usta. Etikdoʻz usta. Tikuvchilik ustasi. Ish ustasidan qoʻrqar. — Maqol

Bu binoni kim qurgan, Koʻk bilan ulashtirib? Qomatin zab oʻxshatgan Ustasi kelishtirib. — Q. Muhammadiy

[Uylagan:] Ogʻil solgan ustalarga doim qarashdim, lekin birovdan bir chaqa soʻraganim yoʻq. — A. Qahhor, Qoʻshchinor chiroqlari

2. Maʼlum kasb yoki hunarni egallashga oʻrgatuvchi shaxs; rahbar, ustoz.

Usta koʻrmagan shogird har maqomda yoʻrgʻalar. — Maqol

Ustaning shogirdi — oʻn toʻrt yashar Yoʻldosh deraza oldida oʻtirardi. — Oybek, Tanlangan asarlar

Aka-uka usta qoʻlida uch yil ishlashdi — Mirmuhsin, Meʼmor

3. Shunday shaxslarni bildiruvchi soʻzlarga (shaxsning ismi yoki buva, amaki kabi soʻzlarga) qoʻshib ishlatiladi.

Qishloq chekkasida usta Abduvahob degan, Ashtdan koʻchib kelib qolgan tojik yashaydi. — T. Ashurov, Oq ot

Usta boboning kayfi chogʻ edi. — S. Siyoyev, Yorugʻlik

Usta amaki, mundan xalat tikib bersangiz. — Guldasta

4. Biror ish, sohaning mashhur, mohir bilagʻoni; mohir.

Badiiy soʻz ustasi. Yuqori hosil ustalari. Sanʼat ustalari.

5. Sportning u yoki bu sohasida maʼlum natijalarni qoʻlga kiritgan sportchilarga beriladigan unvon va shu unvonga ega boʻlgan shaxs.

Sport ustasi. Xizmat koʻrsatgan sport ustasi.

6. Epchil, chechan.

Marasul aka, koʻk piyoz toʻgʻrashga ustasiz — A. Qahhor, Ogʻriq tishlar

Gapga ham usta ekansiz — Mirmuhsin, Meʼmor

Maynabozchilik qilishga usta edi Rahim aka. — F. Musajonov, Himmat

sft. 1. Yuqorida, tepa qismda joylashgan; yuqorigi, tepadagi.

Ustki tish. Ustki jagʻ. Uyning ustki qavati.

[Kamolxonov] Sulaymonovning kulmaganini koʻrib, oʻzini jiddiy koʻrsatish uchun, qoshlarini chimirdi, ustki labini soʻra boshladi. — A. Qahhor, Ikki yorti — bir butun

2. Narsaning tashqi qismida, sirtida joylashgan; sirtidagi.

Normat bintni protivogaz xaltasining ustki choʻntagiga solib qoʻydi. — I. Rahim, Chin muhabbat

Shudgorlarni boronalashni tuproqning ustki qatlami yetilishi bilanoq boshlash kerak. — Gazetadan

ot kt. ayn. Ustoz.

Avaz har kuni ertalab ulugʻ ustodlarining kitoblarini oʻqib, dars olardi. — J. Sharipov, Xorazm

U hatto Hirotda qolib, boshqa bir yerda istiqomat qilsa ham, ustodning qoʻlida xizmat etishni istardi. — Mirmuhsin, Meʼmor