fl. 1. Xotiradan, esdan chiqarmoq; eslayolmay, bilmay qolmoq.
Birovning ismini unutmoq.
Azimov hamma narsani unutib, butun borligʻi bilan shaxmat taxtasi ustiga engashib oldi. — I. Rahim, Chin muhabbat
Axir oradan 30 yildan ortiq vaqt oʻtdi. Unutgan boʻlishi mumkin. — S. Ahmad, Saylanma
2. Esiga kelmaslik, yodidan chiqarmoq; eslamaslik.
Oshga tuz solishni unutmoq.
Zarifboy qimmatbaho telpagini ham unutib, otning boshini choʻrt burdi. — S. Siyoyev, Avaz
[Yoʻlchi] Mehnat uchun haq olishni ham unutib, Yormatning orqasidan ketdi. — Oybek, Tanlangan asarlar
3. Maʼlum muddat xayolidan chiqarmoq, oʻylamay qoʻymoq.
Elmurod dalada oʻzini erkin sezar, gʻam-hasratni unutar, yuragi siqilmas edi. — P. Tursun, Oʻqituvchi
Menga qolsa, u xumpar Margʻilonda xotini borligini unutib yuborgan, deb oʻylayman. — A. Qodiriy, Oʻtgan kunlar
- Oʻzini unutmoq Shoshish, hayajon, gʻazab va shu kabilar sababdan es-hushini, aqlini yoʻqotmoq. birda muruvvatpesha, birda johillikdan oʻzini unutadigan Muhammad Rahimxon [Avazning] ham shafqatini uygʻotar, ham nafratiga turtki berardi. — S. Siyoyev, Yorugʻlik