Qidiruv

ot 1. Yuzi yoyiq, bir oz yalpoq, kosa shaklidagi chuqurroq idish (turli oʻlchamda sopol, chinni, metall, baʼzan marmardan tayyorlanadi).

Sopol tovoq. Chinni tovoq. Tunuka tovoq.

Komil tovoqlarda qaymoq, likoplarda uzum koʻtarib kirdi. — H. Gʻulom, Mashʼal

Buvi, yuzini suzib turgan sutli tovoqni yerga qoʻyib, nima deyapsan? deganday Murodga qaradilar. — A. Mirahmedov, Kulgan chechaklar

2. shv. Lagan.

[Vahob] Bir tovoq xushboʻy palovni keltirib, oldimizga qoʻydi. — M. Muhamedov, Qahramon izidan

3. s. t. Plastinka (patefon, radiola plastinkasi).

Ertalab hosilotning xotini patefon tovogʻini soʻrab chiqibdi. — S. Ahmad, Qadrdon dalalar

ot kam qoʻll. ayn. Hamtovoq.

— Biz — dedi otam, — ishning borishidan oqibati nima boʻlishini sezdik: agar tovoq-doshlarimizga qarasak, oʻshancha turli-tuman lazzatli taomlar oldidan och qorin bilan shaharga qaytishimizni bildik. — S. Ayniy, Esdaliklar

ot Ovqat tayyorlash, yeyish-ichish uchun kerakli uy-roʻzgʻor buyumlari.

Toʻxta xola hovlida idish-tovoq yuvib yurgan ekan, Olimjonni koʻrib, yuragi yorilib ketgudek boʻldi. — I. Rahim, Chin muhabbat

ot 1. Ovqat pishirish va yeyish uchun ishlatiladigan idish-oyoq.

Traktorlar qirga endi koʻtarila boshlaganda, orqadan qozon-tovoq ortilgan ZIL [yuk mashinasi] yetib keldi. — O. Yoqubov, Bahor kunlaridan birida

2. koʻchma Uy-roʻzgʻor ishlari.

Agronom yerini haydab, paxtasini teravermaydimi? Qozon-tovoqqa aralashib nima qiladi! — N. Safarov, Hayot maktabi

Bizda oʻz oilasiga, bola-chaqasiga, qozon-tovogʻiga yopishib olgan xotinlar bor. — A. Muxtor, Opa-singillar