Qidiruv

ot 1. Teng holatga egalik, teng holatlilik (hajm-oʻlcham, sifat, mavqe va boshqalar jihatdan).

Uchburchaklar tengligi. Kuchlar tengligi.

2. huq. Jamiyatdagi barcha shaxs, guruh, qatlam va shu kabilarning qonun oldida baravarligi, teng huquqliligi; haq-huquqda baravarlik.

Tenglik bermoq. Tenglikka erishmoq. Tenglik — kenglik. — Maqol

U yerda tenglik va doʻstlik, sevgi va mehnat — oila baxtining manbai. — Oybek, Nur qidirib

3. mat. Muayyan kattaliklar oʻrtasida bir kattalik ikkinchisiga teng ekanini koʻrsatuvchi oʻzaro nisbat.

Uchburchaklar tengligi. Tenglik ishorasi (=).

sft. 1. Oʻlchami, hajmi, katta-kichikligi, soni va shu kabilar jihatidan oʻxshash, bir xil, baravar.

Teng masofalar. Uzunligi teng yogʻochlar. Teng yeganni tangri sevibdi. — Maqol

Biz qachon oʻqiymiz? deb Qamishkapaning teng yarmi boʻlgan ayollar talab qilsa-yu, ularning talabini qondirish birinchi galda sovetning vazifasi emasmi? — P. Tursun, Oʻqituvchi

Ikki tomoni teng boʻlgan uchburchak teng yonli uchburchak deyiladi. — Geometriya

2. Yoshi jihatidan baravar, tengdosh, tengqur.

Teng bolalar.

Oʻktamboy ham oʻz tenglari ichida durkun, orqasida olti pud yuk koʻtarish bilan maqtanadirgan yigit. — A. Qodiriy, Obid ketmon

3. Ahamiyati, tutgan oʻrni, mavqeyi, nufuzi, haq-huquqi va shu kabilar jihatidan oʻxshash, bir xil, baravar.

Bu yerda u [Elmurod] birinchi marta oʻzini boshqalar bilan teng odam his qilar edi. — P. Tursun, Oʻqituvchi

Uning [Umri] uchun olamda oʻziga teng odam yoʻq, u bilgan odamlar yo oʻzidan past, yo oʻzidan yuqori. — A. Qahhor, Xotinlar

Toʻlib yetilgan qiz endi uning [yigitning[ koʻz oldida tengi topilmas goʻzal boʻlib qoldi. — P. Tursun, Oʻqituvchi

[Xumorxon:[ Burungi vaqtda erlarga choʻri boʻlgan xotinlar hozir erlar bilan teng. — A. Qahhor, Ogʻriq tishlar

4. Bir-biriga mos, muvofiq, munosib.

Tengini topsang, tekin ber. — Maqol

Teng-tengi bilan, tezak qopi bilan. — Maqol

Chin doʻst tugʻishganing bilan teng. — Maqol

Men hech sening tenging emasman. Omonim bor — seni demasman. — H. Olimjon

Akasi munosib, axloqli, odobli, or-nomusli yigit boʻlsa, bu qiz ham uning tengi, munosibi edi. — Mushtum

5. rvsh. Bir-biridan qolishmay yoki oʻz-may, ayni bir paytda, bir vaqtning oʻzida; baravar.

Ular teng tugʻilgan. Bu koʻchatlar teng ekilgan. Teng ishlamoq.

Tohir-Zuhra holidan bir kalima eshiting: Oʻqib, oʻynab bir bogʻda ulgʻayar edilar teng. — S. Abdulla, Tohir va Zuhra

6. koʻm. vzf. (3-shaxs egalik shaklida) Tenglik jihatdan oʻxshatish, qiyos maʼnosini bildiradi; qatori.

Bu — qotmadan kelgan, qoracha, leytenant Sultonov tengi yigit edi. — Oʻ. Umarbekov, Yoz yomgʻiri

Anvar uz tengi bolalar bilan oz aloqa qilar, ularga kam aralashar edi. — A. Qodiriy, Mehrobdan chayon

[Oqiljon] Oʻzi yaxshigina, siz tengi kishi edi. — Oybek, Tanlangan asarlar

Xalq tengi dam olmoq — bu huquqimiz — Oybek, Oltin vodiydan shabadalar

ot Qozogʻiston Respublikasi milliy pul birligi.

ot 1. Yosh jihatdan teng yoki uncha farq qilmaydigan kishilar; birga oʻsib katta boʻlgan oʻrtoqlar; tengdosh, teng-tush.

Tengqurlarim — besh yil bir auditoriyada oʻqigan qadrdonlarim — toʻda-toʻda boʻlib, safarga otlanishardi. — H. Nazir, Muhabbat

Shu orada Alpomish qirqta tengqur joʻrasi bilan Boysarini izlab, Qalmiq yurtiga borib, qalmoq shohga bandi boʻlib qoldi. — Alpomish

2. folk. Munosib, muvofiq, mos.

Menga tengqur boʻlolmaysan, Koʻngliginang qurib ketsin. — Poʻlkan

sft. 1. Tengi, misli yoʻq, mislsiz; haddan ziyod.

Tengsiz goʻzal qiz. U soʻz sanʼatida tengsiz edi.

— Oʻzim koʻrmadim, — dedi Oftob oyim, —ammo koʻrguvchilarning soʻzlariga qaraganda, oʻxshashsiz koʻrkam, tengsiz aqlli bir yigit emish. — A. Qodiriy, Oʻtgan kunlar

Fashist gazandalari xalq xoʻjaligiga tengsiz zarar yetkazdilar. — N. Safarov, Olovli izlar

2. Biror jihatdan (masalan, mavqe, haq-huquq, kuch-qudrat va boshqalar jihatdan) teng kelolmaydigan, teng boʻlmagan.

Tengsiz bilan teng boʻlma! — Maqol

Maqol bor: orzuga ayb emasdir, Yigitman, menga sen tengsiz demasdir. — Habibiy

Biz mamlakat ichkarisidagi qismlarni chegaraga toʻplay olmadik. Birinchi kunlarda tengsiz janglar boʻldi. — I. Rahim, Chin muhabbat

ot 1. Yoshi baravar, teng, tengqur.

Tengdosh bolalar. Biz u bilan tengdoshimiz.

Jonim oʻgʻlim, qahramon boʻl mehnat-da, Tengdoshlarga namuna boʻl gʻayratda. — Habibiy

2. Bir vaqtda maydonga kelgan, tugʻilgan, yuz bergan.

Tarjima tarixi adabiyot tarixi bilan tengdosh. — Gʻ. Salomov, Tarjima nazariyasiga kirish

Tarixingdir ming asrlar Ichra pinhon, oʻzbegim. Senga tengdosh Pomir-u Oqsoch Tiyonshon, oʻzbegim. — E. Vohidov